ब्युटी न्युज नेपाल
काठमाडौँ, २० चैत
नेपाल संगीत तथा नाट्य प्रज्ञा प्रतिष्ठानले पहिलो पटक ४० जना नृत्य कलाकारलाई नृत्यक्षर ब्याकरण सिकाएको छ ।
गत मंगलबारबाट यो मंगलबारसम्म आयोजना गरेको सप्ताहव्यापी नृत्यक्षर विज्ञान प्रशिक्षणमा ४० जना नृत्यकारहरुले नृत्य सम्बन्धी व्याकरणीय कला सिकेका हुन् । उनीहरुले सैद्धान्तिकसँग प्रयोगात्मक प्रशिक्षण समेत लिएका छन् । सो प्रतिष्ठानको नृत्य विभागद्धारा यो प्रशिक्षणको आयोजना गरिएको हो ।
नेपाल संगीत तथा नाट्य प्रज्ञा प्रतिष्ठानको सभाकक्षमा नियमित रुपमा ४० जना नृत्यकारहरुले यो प्रशिक्षण लिएका छन् । उनीहरुलाई मंगलबार कार्यक्रमका प्रमुख अतिथि राष्ट्रिय सभा सदस्य जगप्रसाद शर्मा, नेपालका प्रथम नृत्य निर्देशक भैरवबहादुर थापा, सो प्रतिष्ठानका उपकुलपति शम्भु राई, सदस्य सचिब प्रगती महरा, परिषद सदस्य एवम् नृत्य विभाग प्रमुख सुवर्ण हमाललगायतले प्रमाणपत्र प्रदान गरे ।
समापन कार्यक्रममा सबैलाई स्वागत गर्दै नेपाल संगीत तथा नाट्य प्रज्ञा प्रतिष्ठानको प्राज्ञ परिषद् सदस्य तथा नृत्य विभाग प्रमुख सुवर्ण हमालले नृत्यको व्याकरणबारे नृत्यकारहरुनै अनविज्ञ भएको बेला यो प्रशिक्षण नृत्य कलाकारलाई दिएको बताए । जसबाट नृत्य कलाकारलाई सैद्धान्तिक र व्यवहारिक ज्ञान मिलेकोमा भन्दै एक साताको प्रशिक्षणमा नृत्य कलाकारहरूले सोचेको भन्दा बढी नै सिक्ने अवसर पाएको पनि हमालले बताए ।
कार्यक्रमलाई सम्बोधन गर्दै शर्माले विश्वका ठूला परिवर्तन र आविष्कार ज्यादै सामान्य र सरल रुपमा शुरु हुने भन्दै भैरवबहादुर थापाद्वारा प्रतिपादित नृत्याक्षर विज्ञान सिङ्गो मानवजातिकै संश्लेषित पुँजी भएको धारणा राखे । सात दसकभन्दा बढी नृत्य क्षेत्रमा साधना गरेर नृत्याक्षर विज्ञानको रुपमा थापाले नृत्यलिपिको विकास गरेकोमा सिङ्गो राज्यले गौरब गर्नु पर्ने र थापाको जन्म दिन फागुन ६ गतेलाई राष्ट्रिय नृत्य दिवसका रुपमा मनाउन सरकारसँग आफूले पहल गर्ने प्रतिबद्धतथा पनि उनले जनाए ।
कार्यक्रममा प्रथम नृत्य निर्देशक एवम् नृत्यगुरु भैरवबहादुर थापाले कार्यशालाई विरुवा उमार्ने अवसरका रुपमा लिँदै प्रशिक्षार्थीहरुलाई आफूले सिकेको ज्ञान अरुसम्म पुर्याउन पनि अनुरोध गरे । नृत्य गुरु थापाले अर्को एक प्रसङ्गमा राज्यले संस्कृतिलाई हवाइजहाज उडाउने संस्था र पर्यटनसँग जोडेको भन्दै सांस्कृतिक क्षेत्रमा काम गर्ने छुट्टै मन्त्रालय हुनुपर्ने माग सो कार्यक्रममा राखे ।
नेपाल संगीत तथा नाट्य प्रज्ञा प्रतिष्ठानका उपकुलपति शम्भु राईले यसरी नृत्यक्षरमा आधारित रहेर नेपालमा पहिलो पटक प्रतिष्ठानले यस्तो प्रशिक्षण दिएको जिकिर गरे । यसै गरी सो प्रतिष्ठानकी सदस्य सचिव प्रगति महराले पनि नृत्य सम्बन्धि यो प्रशिक्षण बिगतको भन्दा निकै फरक र थप उपयोगी भएको जिकिर गरिन् ।
आफूहरूले यस अघि विभिन्न कार्यक्रममा नृत्य प्रस्तुत गर्दै आए पनि यसको शास्त्रीय तथा सैद्धान्तिक ज्ञानको अभाव भएकाले यो प्रशिक्षण निकै उपयोगी हुने प्रशिक्षार्थीहरुले कार्यक्रममा बताए । उनीहरुलाई दैनिक ६ घन्टाको दरले साप्ताहिक रुपमा ४९ घण्टाको प्रशिक्षण दिईएको थियो । समापन समारोहमा प्रशिक्षार्थी निर्मला नेपाल र दीपेश माझीले आफ्नो अनुभव सुनाउँदै यस पटक नृत्य क्षर सम्बन्धी प्रशिक्षण लिँदा आफूहरूले गरिरहेको नृत्यका बारेमा अझ राम्ररी बुझ्ने अवसर पाएको बताए ।
सप्ताहव्यापी नृत्यक्षर प्रशिक्षण कार्यक्रममा उनीहरूलाई नृत्य निर्देशक कृष्ण प्रसाद पौडेल र अनमी बोहराले प्रशिक्षण दिएका थिए । प्रशिक्षार्थीहरूलाई यस पटक नृत्य क्षण अर्थात् नृत्यको सैद्धान्तिक ज्ञान, भाव, मुद्रासँगै प्रयोगात्मक रूपमा नृत्य प्रशिक्षण दिएको पौडेलले बताए । कार्यक्रममा लिएको नृत्य प्रशिक्षण अन्तर्गतको नृत्य गरेर समेत उनीहरूले कार्यक्रममा देखाए । आफूहरूले अभ्यासका क्रममा गरेको नृत्यका भावहरू सहितको प्रस्तुति सम्बन्धित कलाकारहरूले देखाएका थिए ।
