दर्शकको राम्रो प्रतिक्रियासँगै बढ्यो फेरि रेशम फिलिलीको व्यापार


ब्युटी न्युज नेपाल
काठमाडौँ, १८ फागुन

नेपाली चलचित्र फेरि रेशम फिलिलीले दर्शकबाट यतिबेला राम्रो प्रसंसा पाईरहेको छ । यो चलचित्र हेर्नेले मनोरञ्जन भरपुर, पैसा असुल नारा भन्दै चलचित्रको प्रसँसा गरिरहेका छन् । यो चलचित्र बुधबार महाशिवरात्रिको अवसरमा रिलिज भएको थियो । चलचित्रले हिजो शनिबार राम्रो अनुपेन्सी पायो ।

दर्शकको राम्रो अकुपेन्सी मिलेसँगै सिनेमाका कलाकारहरु विभिन्न हलमा पुगेर दर्शकसँग साक्षात्कार गरे । दर्शकले पनि सिनेमाका कलाकारलाई देख्दा सेल्फी खिच्नुका साथै कलाकारसँग ‘फेरि जालमा’ गीतमा नृत्य समेत गरेका थिए । सिनेमा हेर्ने अधिकांश कथावस्तु र त्यसले दिएको सन्देशले मने जितेको प्रतिक्रिया दिएका छन् ।

यो चलचित्रका वितरक गोविन्द शाहीले शनिबार धेरै जसो चलचित्र घरमा हाउसफुल भएको बताए । उनले भने,‘हिजो शनिबार त धेरै ठाउँमा हाउसफुल भयो । बिहिबार शो कम भए पनि शुक्रबारबाट बिस्तरै बढेको शोहरु शनिबार पुन पहिलो दिनकै लयमा फर्किएको छ र आज आईतबार पनि हलहरुमा राम्रो अक्युपेन्सी फेरि रेशम फिलिलीको रहेको छ ।

यो चलचित्रका निर्माता रौनक विक्रम कँडेल पनि चलचित्रले दर्शकबाट पाएको सुखद प्रतिकृयाप्रति खुसी छन् । चलचित्रको दोश्रो दिन व्यापार केही कमजोर भए पनि शुक्रबारबाट बढेको र शनिबार निकै राम्रो भएको उनले बताए । अहिले चलचित्रको राम्रो माउथ पब्लिसिटी भईरहेको पनि रौनकले जानकारी गराए ।

हुन पनि सँगै रिलिज भएका अरुका चलचित्रहरु बक्स अफिसमा हाउसफुल देखिए पनि हल खाली देखिएको छ । तर फेरि रेशम फिलिलीमा बक्स अफिससँगै हलमा पनि हाउसफुल देखियो ।

शनिबार चलचित्र घरमा पुगेका यो चलचित्रका निर्देशक निरोज महर्जनले दर्शक प्रतिक्रिया पश्चात मिडियासँग कुरा गर्दै चलचित्रले दर्शकबाट राम्रो प्रतिक्रिया र निरन्तर साथ पाईरहेको बताए । उनले भने,‘आफुले सिनेमा जे सोचेर बनाएको थिए । त्यसमा दर्शक तथा समीक्षकबाट मिलेको उत्कृष्ट प्रतिक्रियाले हौसला मिलेको छ ।’

यता सिनेमाका मुख्य अभिनेता विनय श्रेष्ठले पनि दर्शकबाट राम्रो प्रसँसा पाईरहेको बताए । आफ्नो र कामेश्वर चौरसियाको कामको दर्शकबाट तारिफ पाएको पनि उनले बताए ।

सिनेमाका अर्का अभिनेता हरिया अर्थात् कामेश्वर चौरासियाले शनिबार हलमा पुग्दा आफ्नो कामको निकै तारिफ गरेको बताए । सबैले चलचित्र राम्रो भन्दा उनी पुलकित देखिए ।

यो चलचित्रकी मुख्य अभिनेत्री सुपुष्पा भट्टले दर्शकबाट आफ्नो भूमिकालाई राम्रो प्रतिक्रिया मिलेरहेको भन्दै खुशी व्यक्त गरिन् । आफ्नो अघिल्ला सिनेमाको तुलनामा यो चलचित्रमा आफ्नो अभिनय धेरै नै राम्रो भएको प्रतिक्रिया दर्शकबाट मिलिरहेको उनको भनाई छ ।

सिनेमामा विनय श्रेष्ठ, सुपुष्प भट्ट, कामेश्वर चौरासिया, नीर शाह, प्रकाश घिमिरे, शिशिर वाङ्गदेल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश दाहाल, सजन थापा लगायतको पनि अभिनय छ ।

सुसन प्रजापतीको छायांकन, निर्देशक महर्जन र आकाश बरालको पटकथा, नरेश किङ्ग योगीको द्धन्द्व निर्देशन तथा कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको संगीत र सुरेन्द्र पौडेलको सम्पादन सिनेमामा रहेको छ । सिनेमा आट्र्स र वि मोसन पिक्चर्सको सहकार्यमा निर्माण भएको सिनेमामा रौनक विक्रम कडेल निर्माता तथा कार्यकारी निर्माता सुरज बम ठकुरी र सह–निर्मातामा एनि थापा छन् । सिनेमालाई निरोज महर्जनले निर्देशन गरेका हुन् । सिनेमाको कथा पनि उनले नै लेखेका हुन् । यो सिनेमालाई गोविन्द शाहीको काफिया फिल्मस् र कुवेर सिने डिष्ट्रीव्युसनले वितरण गर्दैछन् ।