ब्युटी न्युज नेपाल
काठमाडौँ, १७ फागुन
आगामी २९ फागुनमा नयाँ चलचित्र ‘आउटलः दफा २१९’ रिलिज हुँदै छ । यो चलचित्र एक्सन प्रधान जनरामा निर्माण भएको छ । यो चलचित्रको ट्रेलर शुक्रवार रिलिज गरिएको छ । ट्रेलर हेर्दा यो चलचित्र अहिलेसम्मकै उत्कृष्ट एक्सन प्रधान जनरामा छ भन्ने देखिन्छ ।
मुलत अभिनेता सुशील श्रेष्ठले यसमा निकै मेहनत गरेका छन् । विगतमा चकलेटी अभिनेताको रूपमा परिचय बनाएका सुशीलको यो चलचित्रबाट परिचय परिवर्तन भएर एक्सन नायकको रूपमा स्थापित हुने देखिन्छ ।
विक्की महर्जनको लेखन तथा निर्देशनमा तयार भएको यो चलचित्रमा सुशील श्रेष्ठ, शिक्षा संग्रौला, नरेश पौडेल, सुमन भण्डारी, हेम महर्जन, सोनी लगुन, विशाल पहारी, महेश त्रिपाठी, मारिया कार्की र अयान परियारको अभिनय छ ।
फिल्मको ट्रेलर हेर्दा यसको मेकिङ, कथावस्तु, एक्सन गज्जब देखिएको छ । नायक सुशील श्रेष्ठलाई ‘एक्सन स्टार’मा रूपमा प्रस्तुत गरिएको फिल्ममा उनको काम पनि तारिफयोग्य देखिएको छ ।
फिल्ममा समावेश केही संवादहरू दर्शकको नजरमा पर्न सक्छन् । ‘यहाँ व्वासोहरु झुन्डमा हिँडेर आफूलाई बाघ ठान्छन् । तर, बाघलाई के थाहा बाघ एक्लै आउँछ र एक्लै सिकार गर्छ ।’ यो बाहेक अन्य केही संवाद पनि दर्शकको नजरमा पर्न सक्छन् । जस्तै ‘हिजोसम्म स्यालको सरकार देखेकी थिइस्, आज बाघको सरकार देखिस्’ भन्ने संवाद पनि हिट हुने देखिन्छ ।
नेपालमा यो वर्ष एक्सन कथाका फिल्मलाई रुचाइएको छ । यसैले, फरक शैलीको एक्सन र न्यायको कथामा बनेको यो फिल्मले पनि दर्शकको साथ पाउने विश्वास गर्न सकिन्छ ।
विकास चौधरी सह–निर्माता रहेको फिल्मका कार्यकारी निर्माता विनोद कठायत हुन् । साहिल खानको सम्पादन रहेको फिल्ममा चुल्ठे काजीको एक्सन निर्देशन छ । यो फिल्ममा अमित अग्रहरी र निशा गुइडेको लगानी छ । फिल्ममा विक्की महर्जन र विनोद कठायतको पटकथा, नवीन गुरुङको डीओपी छ ।
