फेरि रेशम फिलिलीको ग्रिन कार्डैमा रिलिज 


ब्युटी न्युज नेपाल
काठमाडौं, १ माघ

रेशम फिलिलीको सिक्वेल चलचित्र ‘फेरि रेशम फिलिली’ निर्माण भएको छ । महाशिवरात्रिको अवसर पारेर फागुन १४ गतेबाट प्रदर्शनमा आउन लागेको यो चलचित्रको पहिलो गीत रिलिज भएको छ । मङ्गलवार माघे सङ्क्रान्तिको अवसरमा यसको पहिलो गीत ‘ग्रिन कार्डैमा…’को भिडियो रिलिज गरिएको हो ।

गीतमा दीपक शर्माको शब्द रचना तथा संगीत रहेको छ । यो गीतलाई डेविट शंकरको स्वर रेकर्ड गरिएको छ । गीतको भिडियोमा यसका मुख्य कलाकार विनय श्रेष्ठ र सहयोगी कलाकारहरुले अभिनय गरेका छन् । नायकलाई अमेरिका जाने डिभी परेर ग्रिनकार्ड बनेपछि उनलाई गाउँमा केटी दिनेहरुको ताँती लाग्छ । यही प्रसँगमा यो गीतको भिडियो बनाइएको छ ।

सिनेमा आर्ट र वि मोसन पिक्चर्सको सहकार्यमा निर्माण सिनेमाका लेखक र निर्देशक निरोज महर्जन हुन् । रौनक विक्रम कडेल निर्माता रहेको सिनेमाका कार्यकारी निर्माता सुरज विक्रम ठकुरी र सह–निर्मातामा एनि थापा छन् । यो सिनेमाले गीत संगीतको माध्यमबाट दर्शकमाझ पुरानो ‘रेशम फिलिली’को जस्तो प्रभाव छोड्ने विश्वास निर्माण टिमको छ ।

सिनेमामा विनय श्रेष्ठ, सुपुष्पा भट्ट, नीर शाह, कामेश्वर चौरासिया, प्रकाश घिमिरे, शिशिर वाङ्गदेल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापा लगायतको पनि अभिनय छ । यो सिनेमामा ‘रेशम फिलिली’का निर्देशक प्रनव जोशी र अभिनेत्री मेनुका प्रधान बाहेकको अधिकांश टिम पुरानै रहेको छ ।

सुसन प्रजापतीको छायांकन, निर्देशक महर्जन र आकाश बरालको पटकथा, नरेश किङ्ग योगीको द्वन्द्व निर्देशन तथा कालीप्रसाद बाँस्कोटा, एसडी योगी, हर्क साउद, जयन जे वाइबा र दीपक शर्माको संगीत र सुरेन्द्र पौडेलको सम्पादन सिनेमामा रहेको छ । यो सिनेमालाई गोविन्द शाहीको काफिया फिल्मस् र कुवेर सिने डिष्ट्रीव्युसनले वितरण गर्दै छन् ।