ब्युटी न्युज नेपाल
काठमाडौं, २८ पुस
आगामी २२ चैतमा रिलिज हुने नयाँ चलचित्र वसन्तको गीत साँझ पर्यो झम्मक…को भिडियो काठमाडौंमा एक समारोहबीच शनिबार बेलुका सार्वजनिक गरिएको छ ।
गायक प्रकास सपुतको डेव्यु निर्देशकिय सिनेमा वसन्तको यो गीतमा प्रकाश सपुतको शब्द तथा संगीत रहेको छ । गीतमा स्वर शान्ति श्री परियार र गायक तथा संगीतकार सपुतले दिएका छन् ।
गीतमा गायक तथा निर्देशक प्रकास सपुतले बागलुङ जिल्ला आसपासमा परिचित यानिमाया, सालैजो र घाँसदाउरा अनि मेलापातमा प्रयोग हने टिपिकल ग्रामिण परिवेश देखाएका छन् ।
मौसम हिमालीको कोरियोग्राफी तथा प्रविन भट्टको सम्पादन रहेको छ । जसमा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी र खड्क बहादुर पुन (खबपु)ले अभिनय गरेका छन् । यो चलचित्रमा अनुप बराल, कमलमणी नेपाल, प्रकाश घिमिरेलगायतका कलाकारको पनि अभिनय रहेको छ ।
वसन्त निर्माणमा आफु र आफ्नो टिमले निकै मेहनत गरेकाले आफुले सोचेको र खोजेकै जस्तो रिजल्ट निस्कनेमा गायक, अभिनेता तथा निर्देशक सपुतको विश्वास छ । गायक तथा निर्देशक सपुतको जन्मथलो बागलुङ, काठमाडौं र तराईका विभिन्न ठाउँमा सिनेमाको छायांकन गरिएको हो ।
गलबन्दी प्रोडक्सनको प्रस्तुति रहने सोसल ड्रामा सिनेमामा कथा, पटकथा र संगीत पनि सपुतले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा सिनेमाले भन्ने छ । सिनेमा निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन् । सिनेमालाई सुसन प्रजापतिले खिचेका हुन् । काठमाडौं उपत्यकामा डिसिएन र मोफसलमा एफडी कम्पनिले सिनेमालाई वितरण गर्नेछन् ।
