ब्युटी न्युज नेपाल
काठमाडौं, १७ पुस
नेपाली चलचित्र ‘रंगी’ को टिजर सार्वजनिक गरिएको छ । सान्भी इन्टरटेनमेन्ट प्रालिको व्यानरमा निर्माण भएको यो चलचित्रमा अभिनेता सलोन बस्नेत प्रस्तुतकर्ता रहेका छन् । एक मिनेट ३५ सेकेण्डको टिजरमा चलचित्रका प्रमुख दुई पात्र सलोन बस्नेत र आयुषी ढकालको कथा प्रस्तुत छ ।
टिजरमा छोरी आयुषी र बाबु सलोनको प्रेम, छोरीका लागि सलोनको संघर्ष देखाइएको छ । टिजर खुशी, रोदन र पीडा मिश्रित छ । फुड डेलिभरी ब्वाई बनेका सलोनले छोरीका लागि पानीमा भिज्दै काम गरेको दृश्य, छोरीलाई स्याहार सुसार गरेको दृश्य टिजरमा हेर्न पाइन्छ । टिजरमा कारले हिर्काएर घाइते भएकी छोरीलाई हातमा बोकेर सलोन चिच्याएको दृश्य निकै कारुणिक छ ।
टिजरमा फिल्मकी अर्की प्रमुख कलाकार नम्रता श्रेष्ठको सलोनसँगको निकटता देखाइएको छ । यो फिल्म आगामी फागुन २ गते रिलिज हुँदैछ । यसअघि फिल्मका दुई पोस्टर सार्वजनिक भइसकेका छन् । सार्वजनिक पोस्टरले फिल्मलाई एक किसिमको हाइप दिइसकेको छ ।
सुरेश न्यौपानेको ‘डेब्यू’ निर्देशन रहेको फिल्ममा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको अभिनय छ । प्रस्तुतकर्ता सलोनका अनुसार फिल्मले बाबुछोरीको कथा देखाउनेछ । फिल्म ‘रंगी’ सलोनको डेब्यू निर्माण हो ।
फिल्मलाई एप्पल इन्टरटेनमेन्ट, एफडी र रिच इन्टरटेनमेन्टले वितरण गर्दैछ । यो चलचित्रमा सक्षम सुवेदी, करिश्मा केसी बस्नेत र अनिश गौतमको निर्माण रहेको छ ।
