ब्युटी न्युज नेपाल
काठमाडौं, १७ पुस
चलचित्र ‘मायाबी’को नयाँ गीतको भिडियो सार्वजनिक गरिएको छ । यो चलचित्र आगामी १४ फागुनमा रिलिज हुँदैछ । प्रदर्शन मिति नजिकिँदै गर्दा यो चलचित्रको पहिलो गीत ‘त्यो माया हो…’ रिलिज गरिएको हो ।
यो चलचित्रमा पल शाह, दीपिका प्रसाईं, प्रशान्त ताम्राकार, सुशिल सिटौला, करिश्मा श्रेष्ठ, लक्ष्मी गिरी, अञ्सु महर्जन, राजाराम पौडेल, रवि डंगोल, राम प्रसाई, दीपेन्द्र सिम्खडा, संगीता सिलवाललगायतको मुख्य भूमिका रहेको छ । बुधबार सार्वजनिक गरिएको गीतको भिडियोमा फिल्मका मुख्य दुई कलाकारहरु नायक पल शाह र नायिका दीपिका प्रसाँइको प्रेम अनुभुती हेर्न सकिन्छ ।
सफ्ट शैलीको यो रोमान्टिक गीतमा पल र दीपिकाले एक अर्कामा प्रेमको भावना पोखेका छन् । यो गीतमा एसडी योगी र सदीक्षा कट्टेलको स्वर, राम अविरल बिष्टको शब्द, एसडी योगीकै संगीत छ ।
सार्वजनिक गीतको भिडियोलाई कविराज गहतराजले कोरियोग्राफी गरेका हुन् । राजु विक्रम थापाको फिल्ममा डीओपी छ भने मिलन श्रेष्ठ फिल्मको सम्पादक हुन् ।
यो फिल्ममा दिवाकर भट्टराइको कथा, लेखन तथा निर्देशन छ । फिल्ममा ध्रुव न्यौपाने, राज कटुवाल र चन्द्र पन्तको लगानी छ । प्रविण भट्टराई र करण सिंह कार्यकारी निर्माता रहेको फिल्ममा मञ्जु भण्डारी, राजु पराजुली र सुमित ओलीको सह–निर्माण छ ।
यो चलचित्रमा यो फिल्ममा शम्भुजित बास्कोटा र एसडी योगीको संगीत, साहिल खानको ट्रेलर छ । फिल्म ‘मायाबी’ले प्रेम र मित्रताको आभाष दर्शकलाई गराउने निर्देशक भट्टराइको विश्वास छ ।
कमेडी, एक्सन र पारिवारिक फिल्म चलिरहेको समयमा नेपाली फिल्मले कही कतै लभ स्टोरी फिल्मको अभाव महशुश गरिरहेको छ । यसलाई ‘मायाबी’ले पुरा गर्ने अपेक्षा गर्न सकिन्छ ।
