ब्युटी न्युज नेपाल
काठमाडौं, ६ पुस
चलचित्र ‘पिताम्बर’को रिलिज आगामी नववर्षको छोका पारेर २९ चैतमा गरिने भएको छ । शुक्रबार सिनेमाको एक पोस्टर सार्वजनिक गर्दै निर्माण टिमले चैत्र २९ गते नेपाली नयाँ वर्षको अवसरमा ‘पिताम्बर’ प्रदर्शन गर्ने घोषणा गरेको हो ।
चलचित्रलाई कृषा चौलागाई निर्देशन गरेकी हुन् । करिब चार करोडको बजेटमा यो चलचित्र तयार हुन लागेको उनले बताएकी छिन् । यसको छायाँकनमात्र ७० दिन लागेको थियो ।
‘पिताम्बर’को सार्वजनिक पोस्टर आकर्षक देखिएको छ । पोस्टरमा सिनेमाका मुख्य तीन कलाकार प्रदीप खड्का, सौगात मल्ल र दयाहाङ राईलाई कोधित भावमा प्रस्तुत गरिएको छ । पोष्टरमा रगताम्मे प्रदीपले प्रमुख स्थान पाएका छन भने आक्रामक शैलीमा बन्दुक चलाइरहेका सौगात र रिसएका दयाहाङ छेउ छेउमा छन् । शुक्रबार सार्वजनिक पोस्टरले यो सिनेमा एक्सनप्रधान रहेको प्रष्ट भएको छ । यो चलचित्रमा सौगात, प्रदीप र दयाहाङसँगै दिव्या रायमाझि, अनुपविक्रम शाही, सुरक्षा पन्त, प्रमोद अग्रहरी, दिव्यदेव, सुपुष्पा भट्ट, कामेश्वर चौरासिया, गौरव विष्ट, विशाल पहारी लगायतका कलाकारको अभिनय रहेको छ ।
केपी फिल्मसले पुरुषोत्तम प्रधान फिल्मससँग सहकार्य गरेको ‘पिताम्बर’लाई पुरुषोत्तम प्रधानले खिचेका छन् । सिनेमाको निर्मातामा विशाल चौलागाई छन् । यसमा प्रदीप भारद्धाजको लेखन र हिमाल केसीको द्धन्द्व निर्देशन रहेको छ ।
