ब्युटी न्युज नेपाल
काठमाडौं, २२ मंसिर
अमेरिकामा निर्माण गरिएको नेपाली वेब सिरिज ‘घर बट् इन अमेरिका’को नयाँ ‘अमेरिकामा घर छ’ को भिडियो सार्वजनिक गरिएको छ । यो गीतले अमेरिकामा बसोबास गर्ने नेपाली समुदायको जीवनशैली र आपसी सम्बन्धलाई चित्रण गरिएको छ ।
सिरिजको पहिलो सिजनको लागि गीत तयार पारिएको हो । निशान भट्टराईको स्वर, अर्जुन कटुवालको संगीत र डिपी खनालको शब्द रहेको यो गीतमा प्रज्ज्वल खनालले पनि शब्द रचनामा सहयोग गरेका छन् । गीतको भिडियोमा सिरिजका प्रमुख कलाकारहरूलाई देख्न सकिन्छ ।
सिरिजमा नेपालबाट छोरी भेट्न अमेरिका पुगेका अभिभावक र लिभ–इन रिलेशनसिपमा रहेकी छोरीको कथा समेटिएको छ । सिचुएशनल कमेडी–ड्रामा विधामा निर्माण भएको यो सिरिजले अमेरिकामा बसोबास गर्ने नेपाली परिवारको जीवनमा आउने विभिन्न उतारचढावलाई रोचक ढङ्गले प्रस्तुत गर्ने निर्देशक तथा प्रमुख कलाकार बिमलेश अधिकारीले बताए ।
नेपाली चलचित्रकी चर्चित अभिनेत्री अरुणिमा लम्सालले १० वर्षपछि अभिनयमा पुनरागमन गर्दै यस सिरिजमा मुख्य भूमिका निभाएकी छन् । अरुणिमा र बिमलेशसँगै राधाबाबु लम्साल, खेम शर्मा, आशिष दाहाल र रोजिना थापा जस्ता कलाकारहरूले पनि सिरिजमा महत्त्वपूर्ण भूमिका निभाएका छन् ।
निर्देशक अधिकारीकै अवधारणामा बनेको यस सिरिजको पटकथा तथा संवाद विवेक चम्लागाईंले लेखेका छन् । सिरिजको सम्पूर्ण छायाङ्कन संयुक्त राज्य अमेरिकामा गरिएको हो । सेभेन कलर्स डिजिटलले यस सिरिजको निर्माण गरेको हो ।
