ब्युटी न्युज नेपाल
काठमाडौं, १ मंसिर
गायक शिव परियारको स्वरमा नयाँ वियोगान्त गीत बाबा आमा…को भिडियो सार्वजनिक भएको छ । यो गीत निकै मार्मिक छ । गीतको भिडियोलाई शुक्रबार बेलुका ओएसआर डिजिटल युट्युव च्यानलबाट सार्वजनिक गरिएको हो । यो गीतमा संगीतकार दीपक शर्माको संगीत, कुशल सिंहको संगीत संयोजन, राजेश श्रेष्ठको रेकर्डिङ र किशोर थापाको मिक्सिङ रहेको छ ।
यो गीतलाई भुवन लोहनीले लेखेका हुन् । बिगत आधा दशकदेखि अमेरिकामै म्युजिक भिडियो मोडलिङमा सक्रिय रहँदै आएका भुवनले आफ्नो वास्तविक पारिवारिक घटनामा केन्द्रित रहेको र यो गीत लेखेको बताएका छन् । गत वर्ष दशैंमा उनी घर आउने तयरी हुँदै गर्दा फुलपातिको दिन पाल्पाको रानिमहल नजिकै भएको कार दुर्घटनामा भुवनले आफ्ना परिवार नै गुमाएका थिए । जसमा उनका वुवा, आमा, भाउजु, भतिजा र भाउजुको आमाको निधन भएको थियो । सो दुर्घटनामा बाँचेका एकमात्र व्यक्ति उनको दाजु लामो उपचार पछि बल्ल ठिक भएका छन् ।
यसरी कार दुर्घटनामा परिवार नै गुमाएर पीडामा रहेका भुवनले सोही क्रममा वुवा आमाप्रति समर्पण गर्दै नयाँ गीत बाबा आमा…लेखेका थिए । वुवा आमाको वार्षिकको अबसर पारेर यो गीत रेकर्ड गरेको र यतिबेला भिडियो बनाएर दर्शकमाझ ल्याएको उनले बताएका छन् ।
केही वर्षदेखि अमेरिकाको केन्टकी स्थित ल्याग्जिन्टनमा रहँदै आएका भुवनले यस अघि आधा दर्जन म्युजिक भिडियोमा मोडलिङ गरेका थिए । आफैंले लेखेको यो गीतमा भुवन आफैंले छोराको भूमिका निभाएका छन् । यो गीतमा उनको वुवाको रुपमा सरोज खनालले र आमाको रुपमा सूर्यमाला खनालले अभिनय गरेका छन् ,‘कार दुर्घटनामा मेरो परिवार नै नरहे पनि मैले गीत भने वुवा आमामा समर्पित रहेर उहाँको सँघर्षको कथा समेटेर बनाएको हुँ ।’ भुवनले भने ।
यो गीतको भिडियोलाई विशाल घिमिरेले निर्देशन गरेका हुन् । भिडियोको कार्यकारी निर्माता सौगात बस्नेत हुन् । जसमा नवराज उप्रेतीको छायाँकन, सौगात बस्नेतको सम्पादन, राजेन्द्र मोक्तानको रंग संयोजन रहेको छ ।
यो गीतको भिडियो बाबा आमामा सरोज खनाल, सूर्यमाला खनाल, भुवन लोहनी, साईना डंगोल, आशामायाँ डंगोल, संजोग अधिकारी, प्रान्भी अधिकारी, अकलमान डंगोल, सुरेन्द्र डंगोललगायतका कलाकारले अभिनय गरेका छन् । यो गीत जस्तै भिडियो पनि निकै मार्मिक बनेको छ ।
