ब्युटी न्युज नेपाल
काठमाडौं, २५ कात्तिक
गायिका सुशीला बस्नेत तिमिल्सिनाको स्वरमा नयाँ नेपाली म्युजिक भिडियो ‘धेरै दिन…’को भिडियो सार्वजनिक भएको छ । यो गीतका रचनाकार तथा संगीतकार महेश खड्का हुन् । गायिका तिमिल्सिनाले ‘धेरै दिन’ सार्वजनिक गर्दै दर्शकप्रति आभार व्यक्त गरेकी छन् ।
गायिका सुशीला लामो समयदेखि संयुक्त राज्य अमेरिका बस्दै आएकी छन् । प्रवासमा रहेर पनि उनले नेपाली गीत–सङ्गीतलाई निरन्तरता दिएकी छन् । उनले अमेरिकामा हुने विभिन्न साङ्गीतिक कार्यक्रमहरूमा नेपाली कला र संस्कृतिलाई झल्काउने गीत–सङ्गीत प्रस्तुत गर्दै नेपाली पहिचानलाई जीवन्त बनाइरहेकी छन् ।
यो गीतको भिडियोलाई मिनाक्षी कोइरालाले निर्देशन गरेकी छिन् । गीतको भिडियोमा अभिनेता यशराज गराच र मोडल आकृति बस्नेतले अभिनय गरेका छन् । छायाङ्कन दिनेश पराजुलीले गरेका छन् भने नृत्य निर्देशन प्रशान्त मगरले गरेका छन् । प्रवीण भट्टको सम्पादन रहेको छ ।
उनले अघिल्लो गीतमा प्राप्त माया र समर्थनप्रति धन्यवाद दिँदै यो गीतलाई पनि उत्तिकै माया दिन आग्रह गरेकी छिन् । उनले भनिन्, “मेरो सानो प्रस्तुतिले माया पाउनेछ भन्ने आशा गरेकी छु । सुझावलाई माया सम्झेर स्वीकार्ने छु ।“
