ब्युटी न्युज नेपाल
काठमाडौं, २१ कात्तिक
नयाँ चलचित्र ‘मिसिङः केटी हराएको सूचना’ यही कार्तिक ३० गतेबाट रिलिज हुने भएको छ । रिलिज मिति नजिकिँदै गर्दा यो चलचित्रको लागि नयाँ गीत ‘सपनीमा…’ तयार पारेर यसको छायांकन पनि गरिएको छ । यो गीतलाई करुण थापाले लेखेका हुन भने संगीत पनि उनकै हो । दुई दशकपछि करुण यो गीतमार्फत चलचित्र गीत लेखनमा फर्केका हुन् । गीतमा इन्दिरा जोशी र करण परियारको स्वर रहेको छ ।
यो गीतको बुधबार र बिहिबार ललितपुरको चापागाउँ आसपास क्षेत्रमा छायांकन गरिएको छ । गीतको भिडियोमा चलचित्रका कलाकारद्वय नाजिर हुसेन र सृष्टि श्रेष्ठको अभिनय रहने छ । गीतको भिडियोमा मानकृष्ण महर्जनको छायांकन, रामजी लामिछानेको कोरियोग्राफी छ । चलचित्रमा अब यो गीत थपिने भएको छ ।
यो चलचित्रमा नाजिर, सृष्टिसँगै सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, मनोज शाह, अर्जुन पोखरेल र ओमप्रकाश कर्णको अभिनय छ । फिल्ममा अमितेष शाह विशेष भूमिका छन् । यसलाई दीपेन्द्र गौचनले निर्देशन गरेका हुन् ।
नकिम उद्दिन कार्यकारी निर्माता रहेको फिल्ममा मनोहर दास मुल, अनिन राजभण्डारी, राजीव थापा, रोबिन थापा, राधेश पन्त, महेन्द्र शाक्य, ज्योतिमान शेरचन, चन्द्र भट्टचन, सञ्जय भट्टचन सह–कार्यकारी निर्माता, अमितेष शाह सहायक निर्माता, दीपेन्द्र गौचनको कथा र लेखन, अमित पोखरेल र अमितेष शाहको सहायक लेखन, अमित पोखरेलको स्क्रिप्ट सुपरभिजन छ ।
फिल्ममा अमर महर्जनको डीओपी, निमेष श्रेष्ठको सम्पादन, शंकर महर्जनको द्वन्द्व, दीपेन्द्र गौचन, प्रवेश मल्लिक र करुण थापाको संगीत, दीपेन्द्र गौचन, अमितेष शाह, करुण थापाको शब्द, सितुसित बस्नेत, रोहित जोन क्षेत्री, प्रवेश मल्लिक, नेहा प्रियदर्शनी, करण परियार र इन्दिरा जोशीको स्वर, राजीव कर्णको कोरियोग्राफी, काजोल कर्णको सहायक कोरियोग्राफी, जीवन पोखरेल र दीपेशको कष्ट्युम, अकी थेक्पाको आर्ट निर्देशन, राहुल जैरुको सहायक आर्ट निर्देशन र अरुण रेग्मीको प्रोडक्सन छ ।
म्युजिक नेपाल डिजिटल पार्टनर रहेको फिल्म एप्पल इन्टरटेनमेन्ट, एफडी कम्पनी र रिच इन्टरटेनमेन्टले वितरण गर्दैछन् ।
