ब्युटी न्युज नेपाल
काठमाडौं, २२ भदौ
नेपाल प्रहरीका प्रवक्ता दानबहादुर कार्कीले लेखेको नयाँ गीत ’फूलको वासना सरी’ को भिडियो सार्वजनिक भएको छ ।
यो गीतमा प्रहरीको पीडा र भावना समेटिएको छ । गीतमा चर्चित संगीतकार दीपक शर्माले संगीत सृजना गरेका छन् । गीतमा राजेशपायल राई, मेलिना राई, बेनिसा पौडेल र समीर खरेलको स्वर रहेको छ । जसमा श्यामश्वेत रसाइलीको एरेन्ज रहेको छ ।
गीतको भिडियोमा चारजना कलाकारहरुले प्रहरीको भूमिकामा अभिनय गरेका छन् । जसमा अभिनेता रमेश उप्रेती, प्रियँका कार्की, प्रकाश सपुत र बेनिसा पौडेल छन् । यो गीतको भिडियो निर्देशन गम्भीर बिष्टले गरेका हुन् । गीतको स्टोरी र भिडियो कन्सेप्ट भने सरोज ओलीको रहेको छ । यो गीतको भिडियोमा पवन सुसलिङको सम्पादन तथा छायाँकन छ ।
’यो गीतमा हिमालको टुप्पोदेखि तराईको गर्मीसम्म जनताको सेवा र सुरक्षार्थ खटिने नेपाल प्रहरीको अव्यक्त भावना व्यक्त गरिएको छ, गीतका गीतकार एवं प्रहरी प्रवक्ता कार्कीले भने,’यो गीतमा प्रहरीका दुःखहरू पनि छन्, नागरिकप्रति खटिने चाहनाहरू छन्, राष्ट्र र राष्ट्रियताप्रतिको अटल प्रयत्न पनि प्रस्तुत गर्न खोजिएको छ।’
