ब्युटी न्युज नेपाल
काठमाडौं, १३ जेठ
चलचित्र फर्की फर्कीको काठमाडौ उपत्यकासहित देशभरका हलमा शनिबार उच्च व्यापार भएको छ । उपत्यकासहित देशभरका यो चलिचत्र हेर्न दर्शकको संख्या अधिक थियो । बुद्ध जयन्तीको अवसर पारेर १० जेठमा रिलिज भएको यो चलचित्रले बिहीबार र शुक्रबार पनि राम्रो व्यापार गरेको थियो ।
काठमाडौं उपत्यकाका एफक्युब सिनेमाज, अष्टनारायण हल, बिग मुभिज, वान सिनेमाजसहित क्युएफएक्स चेन अन्तर्गतका देशभरका हल हाउसफूल छन् । निर्माता रोहित अधिकारीका अनुसार उपत्यका बाहिरका प्रमुख सहरहरुमा पनि फिल्मप्रति दर्शकको उल्लेख्य उपस्थिति छ ।
दर्शकमाझ फिल्म आएपछि फिल्मका प्रमुख कलाकार अनमोल केसी, जसिता गुरुङ, रवि काफ्ले, निर्देशक सुयोग गुरुङ, वितरक गोविन्द शाही बिहानदेखि नै दर्शक प्रतिक्रिया बुझ्न हल–हल पुगे ।
निर्माता रोहित अधिकारीले पछिल्लो समयमा कथात्मक फिल्मको लहर चलिरहेको बेला त्यसलाई चिर्दै प्रेमकथाको ‘फर्की फर्की’ हेर्न दर्शकको भीड बढेको बताए । ‘बिहीबारदेखि नै हामीलाई दर्शकले राम्रो साथ दिनुभएको छ । आज शनिबार पनि काठमाडौं उपत्यकासहित देशभरका हलमा दर्शक संख्या उच्च छ । हामीलाई दर्शकको उपस्थितिले नयाँ हौसला दिएको छ’, उनले भने ।
निर्देशक गुरुङले दर्शकले फिल्मको कथालाई अधिक मनपराएको बताए,‘अनमोलको कामबाट दर्शकहरु झन बढी खुशी हुनुहुन्छ । फिल्मको मेकिङसँग क्यानभासलाई पनि उत्तिकै मनपराउनुभएको छ’, उनले भने ।
रोहित अधिकारीको निर्माण र सुयोग गुरुङको लेखन तथा निर्देशन रहेको फिल्म ‘फर्की फर्की’मा अनमोल केसी, जसिता गुरुङ, निर्मल शर्मा, लोकेन्द्र लेखक, सलोन बस्नेत, रवि काफ्ले र समृद्धि अर्याललगायतको अभिनय छ ।
