ब्युटी न्युज नेपाल
काठमाडौं, १३ चैत
चलचित्र ‘वर एण्ड बधु’को बाँकी छायाँकन पुन सुरु हुने भएको छ । यो चलचित्रको यस अघि ५० प्रतिशत छायांकन रोमानियामा भएको थियो । दोश्रो सेड्युल अन्तर्गत यो फिल्मको बाँकी ५० प्रतिशत छायांकन अब नेपालमा हुने भएको छ । यसका निर्देशक मिलन चाम्सका अनुसार, चैत्रको तेस्रो साताबाट फिल्मको छायांकन नेपालमा सुरु हुनेछ ।
रोमान्टिक कमेडी कथामा तयार भइरहेको यो फिल्ममा बधुको भूमिकामा नायिका आँचल शर्माले काम गरिरहेकी छिन् । फिल्ममा वरको भूमिकामा भने नव–नायक विवेक कर्माचार्यले अभिनय गरिरहेका छन् ।
फिल्मको दोस्रो सेड्यूलका लागि नायक विवेक कर्माचार्यले आफ्नो शरीर समेत बनाएका छन् । निर्माणपक्षले उपलब्ध गराएको विवेकको नयाँ तस्वीरमा उनको शरीर सुगठित देखिन्छ । कथाको माग अनुसार नै विवेकले शरीर बनाएको निर्देशक चाम्सले बताए । यो फिल्ममा सुदिप बरालको छायांकन छ ।
डाक्टर अमित रिजाल कार्यकारी निर्माता रहेको यो फिल्मलाई एलआरके इन्टरटेन्मेन्टको ब्यानरमा निर्माण गरिएको हो । यो फिल्मले विवाहको संकृतिलाई पर्दामा देखाउने निर्माणपक्षले बताएको छ । फिल्मको प्रदर्शन मिति तय गरिएको छैन छायांकन सकिएपछि रिलिज मिति पनि तय गर्ने बताइएको छ ।
