ब्युटी न्युज नेपाल
काठमाडौँ, ८ फागुन
चलचित्र महाजात्राको प्रदर्शनी मिति निजिकिँदै छ । यो चलचित्र जात्राको तेश्रो सिक्वेल हो । जात्रा मार्फत चलचित्र निर्देशनमा डेब्यु गरेका प्रदीप भट्टराईले यसको सफलतापछि जात्रै जात्रा र अहिले तेश्रो सिक्वेल महाजात्रा निर्देशन गरेका हुन् । यो चलचित्र ९ चैतबाट देशव्यापी रिलिज हुने भएको छ ।
यसै क्रममा चलचित्र महाजात्राको टिजर मँगलबार सार्वजनिक गरिएको छ । यो चलचित्रको टिजरमा जात्रै जात्रामा तीन अभिनेताले सुन लुकाएको दृष्य र त्यसपछिको घटनालाई समेटिएको छ । यसपटक एक गाडी नोट लुकाउनु पर्ने चक्करमा अभिनेता विपिन कार्की र उनको टिमको सँघर्षलाई टिजरमा उठान गरिएको छ । हास्य अभिनेता हरिबँश आचार्य डनको रुपमा टिजरमा प्रस्तुत छन भने राजाराम पौडेल नोट मालिकको रुपमा देखिएका छन् । टिजर रमाईलो छ ।
जात्रै जात्राको सिक्वेल भएका कारण महाजात्रा हेर्नको लागि अघिल्लो फिल्म जात्रै जात्रा पनि हेर्दा अझ यो चलचित्र राम्ररी बुझ्न सकिने टिजरले जनाएको छ । चलचित्रको १ मिनट १२ सेकेन्डको टिजर निकै रमाईलो बनेकोछ । टिजरले महाजात्राको पात्रहरुको चरित्र दर्शाएको छ ।
यो चलचित्रमा जात्रा शृङ्खलाकै कलाकारहरू विपिन कार्की, रवीन्द्रसिंह बानियाँ, रवीन्द्र झा, वर्षा राउत, अरविन खड्का, राजाराम पौडेलको अभिनय छ । यो चलचित्रमा यसपटक अभिनेता हरिवंश आचार्य थपिएका छन् । शृङ्खालाकै निरन्तरता भएकाले दर्शकको अपेक्षा बढ्नेमा उनी जानकार निर्देशक भट्टराईले टिजर सार्वजनिक गर्दै फिल्मको विषयलाई प्रस्ट्याएका छन् ।
दुई सिक्वेलको सफतापछि उनी यो तेश्रो सिक्वेल पनि सफल हुने विश्वासमा छन् । अहिले प्रदीप महाजात्राको प्रचारप्रसारमा जुटेका छन् । यस चलचित्रमा म्याक्स दीपेश खत्री र यज्ञश्वर पौडेल निर्माता छन् । यसमा जित बहादुर रुवाली एसोसियट निर्देशक, पुरुषोत्तम प्रधान छायाँकार, कुमार महर्जन द्वन्द्व निर्देशन, कविराज गहतराज नृत्य निर्देशक, आशिष अविरल सङ्गीतकार, शमशेर लामा शृङ्गार, रूपकप्रताप अधिकारी प्रोडक्सन डिजाइनर, अनिल खड्का मुख्य सहायक निर्देशक रहेका छन् ।
