ब्युटी न्युज नेपाल
काठमाडौं, १६ पुस
अँग्रेजी नयाँ वर्षको अबसर पारेर एकथरी नेपालीहरुले ढाका टोपी दिवस मनाउँदै गर्दा मधेसी समुदायको केही व्यक्तिहरुले आजै माईतिघर मण्डलामा धोती दिवस कार्यक्रम राखेका थिए ।
यसरी धोती दिवस मनाउन माइतीघरमण्डल गएका बेला निषेधित क्षेत्र तोडेको भन्दै प्रहरीले माइतीघरमण्डलबाट सामान्य प्रशासनमन्त्री अनिता देवी सहित केही नेताहरुलाई पक्राउ गरेको छ । जनमत पार्टीकी नेतृ अनिता देवी २९ साउनमा सामान्य प्रशासन मन्त्री नियुक्त भएकी थिइन् ।
प्रहरीसँगको सो झडपमा केहीलाई सामान्य चोटपटक पनि लागेको बताईएको छ । जनमत पार्टीको आयोजनामा सो कार्यक्रम राखिएको हो । माइतीघरदेखि नयाँबानेश्वरसम्म स्थानीय प्रशासनले निषेधित क्षेत्र घोषणा गरेको छ । र, त्यहाँ प्रदर्शन गरेको भन्दै प्रहरीले जनमत पार्टीका नेताहरुलाई पक्राउ गरेको हो ।
प्रहरीले जनमत पार्टीका अध्यक्ष सिके राउतसहित पार्टीका अरु नेताहरुलाई पनि पक्राउ गरेको थियो । त्यसक्रममा सामान्य प्रशासन मन्त्री अनिता देवी पनि पक्राउ परेकी हुन् । सो क्रममा पक्राउ परेका सबैलाई प्रहरीले उनलाई नेपाल पुलिस क्लब, भृकुटीमण्डपमा राखेको छ । साँझसम्ममा उनीहरुलाई छाडिने प्रहरीले जनाएको छ ।
