ब्युटी न्युज नेपाल
काठमाडौं, १९ असोज
पहिलो नम्बरमा, दर्शन सलाम जस्ता हिट गीत दिएका गायक डेभिड शँकरले यतिबेला आफ्नो स्वरमा नयाँ गीत ‘तिमीलाई हेरेर…’को भिडियो बजारमा ल्याएका छन् ।
उनको यो प्रेमिल गीतलाई अनिल तिखत्रीले लेखेका हुन् । जसमा संगीतकार दीपक शर्माको संगीत रहेको छ । दीपककै संगीतमा पहिलो नम्बरमा, दर्शन सलाम जस्ता हिट गीत गाएका डेभिडले यो गीतमा पनि दीपककै संगीतमा स्वर दिएका हुन् ।
पुरुषोत्तम सुवेदीको संगीत संयोजन रहेको यो गीतको भिडियो आकर्षक बनाईएको छ । डेभिडले आफ्नै अफिसियल युट्युव च्यानलबाट आफ्नो यो गीतको भिडियो शुक्रबार बेलुका रिलिज गरेका हुन् ।
यो गीतको भिडियोमा डेभिड आफैंले मोडलिङ गरेका छन् । आफुले निर्माण गरेका कारण यो गीत र गीतको भिडियोलाई आफ्नै च्यानलबाट रिलिज गरेको उनले बताएका छन् । उनी गायकसँगै मोडलिङमा पनि यो गीतबाट उत्रिएका छन् ।
युवराज वाईवाले निर्देशन गरेको यो गीतको भिडियोमा डेभिड शँकरसँग पवी शाकीको अभिनय रहेको छ । भिडियोमा निशल पौडेलको छायाँकन, लोमस पौडेलको सह निर्देशन र विकाश दाहालको सम्पादन रहेको छ । प्रेमालापमा आधारित यो गीतको भिडियोलाई दर्शकले मन पराउने विश्वास गायक डेभिडको छ ।
