काठमाडौं, २९ माघ
लामो समय देखि काठमाडौंमा चलचित्र ‘कान्छी’को निर्माणमा व्यस्त रहँदै आएकी अभिनेत्री एवँ चलचित्र कान्छीकी निर्माता श्वेता खड्का यतीबेला सोही चलचित्रका अभिनेता दयाहाङ राई सहित अर्को माईत चितवन पुगेकी छिन् । कान्छीको प्रचारमा मोफसल गएकी उनी आईतबार माईत चितवन पुगेकी हुन् ।
चलचित्र कान्छी ४ फागुनबाट देशव्यापी प्रदर्शनीमा छ । सोही कारण दयाहाङसँग श्वेता देशव्यापी प्रचार दौडमा उत्रिएकी हुन् । आफ्नो माईत चितवन स्थित भरतपुरमा उनले पत्रकार भेटघाट आयोजना गरेर आफ्नो चलचित्र कान्छीबारे जानकारी गराएकी छिन् ।
आईतबारको प्रेसमिटमा बोल्दै श्वेता र दयाले चलचित्र कान्छीले सबै प्रकारका दर्शकको मन जित्ने जिकिर गरे । ‘कोहिनूर’पछि फिल्म निर्माणमा फर्किएकी श्वेताले चितवन आफ्नो माईतघर रहेको समेत बताइन् ।
श्वेताको पहिलो चलचित्र ‘कहाँ भेटिएला’को छायाँकन चितवनमा गरिएको थियो । दिवँगत निर्देशक शिव रेग्मी निर्देशित सो चलचित्रमा श्वेताको नायकमा दिवँगत अभिनेता श्रीकृष्ण श्रेष्ठ थिए । कान्छीको बारेमा पत्रकारलाई जानकारी गराउँदै चितवनलाई आफ्नो माईतको रुपमा मान्नुको कारण बारे श्वेताले भनिन्,‘ मेरा प्रथम निर्देशक शिव रेग्मीको गाउँ चितवन हो र यहीँबाटै मेरो चलचित्र यात्रा सुरु भएको थियो, त्यसैले म यो ठाउँलाई माईती घर भन्न रुचाउँछु ।’
चितवन आउँदा श्वेताले दिवँगत निर्देशक रेग्मीकी पत्नी ज्ञानु रेग्मीलाई पनि सम्झिइन् । पत्रकार भेटघाटमा अतिथि रहेकी ज्ञानुले श्वेताको कान्छी सफल हुने विश्वास व्यक्त गर्दै यसैगरी हिम्मत गरेर अगाडी बढ्न र सफल हुन श्वेतालाई शुभकामना दिईन् ।
कार्यक्रममा बोल्दै अभिनेता दयाहाङले कान्छी समसामयिक कथावस्तुमा राम्रो चलचित्र बनेको जिकिर गरे । उनले भने,‘सानो सपना र ठुलो दुःख भोगाईका समग्र रुप नै कान्छी हो । तर पुरुषवादी सोचको कान्छी चलचित्र कान्छी होइन, यो त ममतामयी कान्छी हो ।’ आकाश अधिकारी निर्देशित कान्छीको युनिटसँगकाम गर्दा रमाईलो अनुभव पनि दयाहाङले सो क्रममा सुनाए ।
याम थापाको स्क्रिप्ट रहेको कान्छीमा श्वेता र दयाहाङसँगै नीर शाह, अनु शाह, कामेश्वर चौरसिया, आशान्त शर्मा, भूमिका श्रेष्ठ, जयनन्द लामालगायतको मुख्य भूमिका छ ।
राजनराज सिवाकोटीको संगीत रहेको कान्छीको चरी चट्ट परी… बोलको गीत एक करोड भन्दा माथि भिवर्ससँगै हिट भैसकेको छ । चलचित्र कान्छीलाई पुरुषोत्तम प्रधानले खिचेका हुन् । यो चलचित्रको बहुसँख्यक छायाँकन मुस्ताङमा गरिएको हो ।
