ब्युटी न्युज नेपाल
काठमाडौं, ८ भदौ
चलचित्र ‘जय हो’ शुक्रबारबाट देशब्यापी सिनेमा हलमा रिलिज भएको छ । यो चलचित्र एक सय भन्दा बढी सिनेमा हलमा रिलिज भएको निर्माण पक्षले जनाएको छ । यस्तै अष्ट्रेलिया, अमेरिका, कोरिया, दुवई, कतारमा पनि चलचित्र जय हो शुक्रबारबाट रिलिज भएको छ ।
जसमा अभिनेता सलोन बस्नेत, केकी अधिकारी, अर्पण थापा, निशा अधिकारी, माओत्से गुरुङ, प्रेम पाण्डेलगायतको मुख्य भूमिका छ । यो चलचित्रलाई टेक पौरखी राईले निर्देशन गरेका हुन् ।
छायाँकार शौरभ लामाले पोखरा र मुस्ताङको सुन्दरतालाई निकै आकर्षक रुपमा उतारेका छन् । शम्भुजीत बासकोटाको संगीतमा रहेको गीत चलचित्रमा निकै राम्रो देखिएको छ ।
शोभित बस्नेतको निर्माण तथा प्रस्तुति रहेको यो चलचित्रमा पोखरा देखि मुस्ताङसम्मको यात्रामा केकी र सलोनको मायाँ प्रेमको आरोह अबरोह देखाईएको छ । बिगतमा आफुले निर्देशन गर्दै आएका शोभितले यसपटक निर्देशनको जिम्मेवारी अरुलाई सुम्पेका हुन् । शोभितको निर्देशनमा भन्दा यो चलचित्र केही फरक र राम्रो बनेको प्रतिक्रिया प्रिमियर शोमा विभिन्न कलाकारले दिए ।
यो वर्ष चलचित्र जारी पछि अरु सिनेमाले राम्रो व्यापार गर्न सकेको छैन । सुस्ताएको नेपाली चलचित्रको बजारलाई फिल्म जय होले केही मात्रामा भए पनि तताउने विश्वास गरिएको छ । शुक्रबार पहिलो दिन सिनेमाको व्यापार राम्रो भएको निर्माता बस्नेतले बताएका छन् ।
