ब्युटी न्युज नेपाल
काठमाडौं १ साउन
आगामी ८ भदौमा रिलिज हुने नेपाली चलचित्र ‘जय हो’को पहिलो गीत ‘जोमसोमको डाँडैमा..’को भिडियो आज एक समारोहबीच रिलिज गरिएको छ । यो गीतमा बरिष्ट संगीतकार शम्भुजीत बासकोटाको संगीत रहेको छ । लामो समयपछि बासकोटाले चलचित्र जय होको यो गीतमा संगीत दिएका हुन् । आफ्नो यो गीत लोक शैलीको रहेको र फिल्मको कथा अनुसार तयार पारिएको बरिष्ट संगीतकार बासकोटाले कार्यक्रममा बताए ।
यो गीतको रचना पनि बासकोटाले नै गरेका हुन् । जसमा सुरेश लामा र अस्मिता अधिकारीको स्वर रहेको छ । यो गीतको संगीत संयोजन दीक्षित पौडेलले गरेका हुन् ।
यो गीतको छायाँकन मुस्ताङको जोमसोममा गरिएको छ । चलचित्र जय होका मुख्य कलाकार सलोन बस्नेत, केकी अधिकारी, अर्पण थापा, निशा अधिकारी, महोत्सो गुरुङलगायतको यो गीतमा नृत्य रहेको छ । गीतको भिडियो निकै रमाईलो बनेको छ ।
यस अघि आफ्नो सबै जसो चलचित्र निर्देशन गरेका शोभितले यसपटक यो चलचित्रमा निर्देशनको जिम्मा टेक पौखरी राईलाई दिएका छन् । उनी यो चलचित्रमा निर्माताको रुपमा रहेका छन् । सिनेमाका बाँकी निर्माता राज के अधिकारी र सुरज सरकार हुन्।
जय होमा सलोन र केकीसँगै माओत्से गुरुङ, निशा अधिकारी, अर्पण थापा, प्रेम पाण्डे, दिपा शाक्य श्रेष्ठ, सुवी मगर, सुमिन गुरुङ, सुशान्त श्रेष्ठको मुख्य भूमिका छ । जय होमा सम्राट बस्नेतको द्वन्द्व निर्देशन, कविराज गहतराज र रामजी लमिछानेको कोरियोग्राफी, बनिश शाहको सम्पादन र समीर मियाँको भीएफएक्स छ ।
सिनेमामा सुरेश न्यौपानेको कथा लेखन, सौरभ लामाको छायांकन, शम्भुजित बाँस्कोटा र सागर आले मगरको संगीत छ ।
