ब्युटी न्युज नेपाल
काठमाडौं, ३० चैत
तारादेवी स्मृति फाउण्डेसनबाट सम्मानस्वरुप प्राप्त २५ हजार रुपैयाँ रकम वरिष्ठ गायिका शुसिला कंसाकारले छात्रवृत्तिका लागि प्रदान गरेकी छन् । तारादेवी स्मृति फाउण्डेसनले उनलाई २५ हजार नगदसहित सम्मान गरेको थियो । उक्त रकम नै उनले आस्था कलाकेन्द्र नारायणगोपाल चोकमा प्रशिक्षण लिईरहेका विद्यार्थीका लागि छात्रवृत्ति स्वरुप प्रदान गरेकी हुन् ।
२०२२ सालमा प्रेम माणिकको संगीतमा सागरको छातीभरी बोलको गीतबाट गायन क्षेत्रमा प्रवेश गरेकी गायिका कंसाकारका २ दर्जन जति गीत नेपाली आकाशमा गुन्जायमान छन् ।
आस्था कला केन्द्रमा आयोजित कार्यक्रममा उनले आस्था कला केन्द्रका संस्थापक रमेश थापालाई नगद हस्तान्तरण गरिन् । छात्रवृत्ति रकमबाट प्रितम गुरुङ र सुगम राईले ६ महिनासम्म अध्ययन गर्नेछन् ।
कार्यक्रममा नेपाली चलचित्रकी प्रथम नायिका भुवन चन्द, तारादेवी स्मृति फाउण्डेसनका अध्यक्ष दिपक केसी पनि उपस्थित थिए । उनीहरुले गायिका कंसाकार र आस्था कला केन्द्रका बारेमा बोलेका थिए ।
