ब्युटी न्युज नेपाल
काठमाडौँ, ३ फागुन
गायक रामकृष्ण ढकाल र गायिका अन्जु पन्तको स्वरमा नयाँ गीत ‘जिम्बु झानेर’को भिडियो रिलिज भएको छ । काठमाडौँमा एक कार्यक्रमको आयोजना गरी यो गीतको भिडियो सार्वजनिक गरिएको हो । गीतको भिडियो गायक ढकालको अफिसियल यूट्युब च्यानलमार्फत रिलिज गरिएको छ । गीतमा निरज सिग्देलको शब्द रचना र शिखर सन्तोषको संगीत छ ।
यो गीतको भिडियोमा अभिनेता आकाश श्रेष्ठ र नव मोडल गृष्मा तामाङको अभिनय रहेको छ । सार्वजनिक भिडियोकी निर्देशक दीपा शाक्य हुन् ।
पहिलो पटक अभिनय गरेकी तामाङले समय र सन्दर्भ मिलेको खण्डमा आफुले अभिनयको क्षेत्रमा निरन्तरता दिने बताईन् । हाल उनि अष्ट्रेलियामा परिवारको साथ बस्दै आएकी छन् । छुट्टी मनाउन नेपाल आएको समयमा आफुले अभिनय गर्ने मौका पाएको र निरन्तरताको लागि कोशिस गर्ने जनाईन् । निर्देशक शाक्यले बीस बर्ष अगाडि अभिनयबाट आफ्नो यात्रा शुरु भएकोमा अहिले आएर निर्देशन गरिरहेको बताईन् । ‘जिम्बु झानेर’ उनको तेश्रो म्यूजिक भिडियो हो । उनि केहि समय बेलायत बसेर नेपाल आएकी हुन् ।
गायक ढकालले नव मोडल तामाङको प्रशंसा गरे । उनले चर्चित अभिनेता आकाश श्रेष्ठलाई नै टक्कर दिएर अभिनय तथा नृत्य गरेको बताए । ढकालले आफु अझै पूर्ण गायक नबनिसकेको बताउँदै आफुले गायनमा निरन्तरता मात्र दिएको बताए । सानै उमेरदेखि गायन यात्रा सुरू गरेका ढकालले लगभग पाँच हजार गीतमा स्वर दिएका छन् ।
कार्यक्रममा प्रमूख अतिथिको रुपमा उपस्थित बरिष्ठ संगीतकार शम्भूजीत बास्कोटाले गायक ढकाललाई नेपालले प्राप्त गरेको सबैभन्दा ठुलो शान रहेको बताए । उनले ढकाललाई चिन्नु भनेको देशलाई चिन्नु रहेको बताए । त्यस्तै, निर्देशक शाक्य र मोडल तामाङको चर्चा गर्दै दुवैको कामको तारिफ गरे ।
अतिथिको रुपमा उपस्थित तेक्वान्दो खेलाडी दिपक बिष्टले गायक ढकालसँग साथीत्वको लामो यात्रा तय गरेको बताउँदै सार्वजनिक गीतले निकै चर्चा पाउने बिश्वास व्यक्त गरे ।
भिडियोका छायाँकार उत्तम हुमागाईं हुन् भने सम्पादक अमृत चापागाईं हुन् । भिडियोको छायांकन कास्की जिल्लाको घान्द्रुक र पोखरामा भएको हो ।
