ब्युटी न्युज नेपाल
काठमाडौं, १३ माघ
वसन्त पञ्चमीको अबसर पारेर संस्कृतिक संस्थानले बिहिबार नाचघरमा भव्य रुपमा ‘वशन्त शास्त्रीय उत्सव २०७९’ तथा कलाकार प्रशिक्षणअन्र्तगत २९औं व्याजका प्रशिक्षार्थीको दिक्षान्त समारोह सम्पन्न गरेको छ ।
कार्यक्रमका प्रमुख अतिथि संस्कृति पर्यटन तथा नागरिक उड्डयनमन्त्री सुदन किरातीले कार्यक्रमलाई सम्बोधन गर्दै सांस्कृतिक संस्थान सबै नेपालीको साझा संस्कृतिको फुलबारी बन्नुपर्ने बताएका छन् । कार्यक्रममा मन्त्री किरातीले भने, ‘राजा महाराजाले एउटा मुल्यमा स्थापना गरेको यो संस्था अहिले गणतान्त्रिक संस्कृतिमा रुपान्तरीत भएको छ । यो संस्था सबै नेपालीको साझा संस्कृतिको थलो बन्नुपर्छ ।’
संस्थानबाट ६ महिनाको अभिनय कक्षा लिएका प्रशिक्षार्थीहरुले कार्यक्रममा नाटक ‘शंख घोष’ मञ्चन गरे । वरिष्ठ नाट्यकर्मी बीरेन्द्र हमालको परिकल्पना तथा निर्देशन रहेको नाटक हेरेका मन्त्री किराती, राज्यमन्त्री सुशिला सिर्पाली ठकुरीलगायतले प्रशंसा गरेका थिए । राज्यमन्त्री ठकुरीले नेपाली संस्कृतिको जगेर्ना र प्रवर्धनमा सांस्कृतिक संस्थानको ठुलो योगदान रहेको बताईन् ।
संस्थानका महाप्रबन्धक अशोकप्यासी राईले कार्यक्रममा उपस्थित पाहुनाहरुलाई स्वागत गर्दै पछिल्लो समय संस्थान लक्ष्य र उद्देश्यमा आधारित परिणाममुखी काममा लागेको बताए । ‘बर्तमानमा गरेका नीतिगत निर्णय र कामहरु भविश्यमा संस्थानका लागि तागत बन्नुपर्छ’, महाप्रबन्धक राईले भने ।
संस्थानद्धारा सञ्चालित अभिनय, नृत्य, गायन तथा बाद्यबादन विधामा ६ महिना प्रशिक्षण लिएका विद्यार्थीहरुको दीक्षान्त समारोहमा उनीहरुले आआफ्नो विधामा आकर्षक प्रस्तुति दिएका थिए । सबै विधाका गरी लगभग डेढ सय विद्यार्थीलाई समारोहमा प्रमाणपत्रसहित दिक्षित गरिएको थियो । संस्थानका निवर्तमान अध्यक्ष प्रेमनाथ अधिकारी र महाप्रबन्धक अशोकप्यासी राईले प्रमाणपत्र प्रदान गरेका थिए ।
कार्यक्रमको दोश्रो चरणमा स्थापीत कलाकारले शास्त्रीय नृत्य तथा वाद्यवादन प्रस्तुत गरी वशन्त शाश्त्रिय उत्सवलाई रंगीन बनाए । सन्तोषभक्त श्रेष्ठको इश्राजवादन, सुलोचना गोपालीको भरतनाट्यम जति आर्कषक थियो पं. विष्णुप्रसाद आचार्यको ध्रुपद गायन त्यतिकै रोमाञ्चक थियो ।
कार्यक्रममा संस्कृति पर्यटन तथा नागरिक उड्डयन मन्त्रालयका सचिव सुरेश अधिकारी, संगीत तथा नाट्य प्रज्ञा प्रतिष्ठानका पुर्वकुलपति नारायणभक्त श्रेष्ठ ‘रायन’, नेपाल ललितकला प्रज्ञा प्रतिष्ठानका पुर्वकुलपति केके कर्मचार्यलगायतले दिक्षित भएका विद्यार्थीको प्रस्तुतिको प्रशंसा गरेका थिए । सो अवसरमा प्रा. श्रीराम आचार्य र सहप्रा. सरोजनी तण्डुकारद्धारा लिखित पुस्तक ‘संगीत मन्थनाञ्जली’ पनि विमोचन गरिएको थियो ।
