ब्युटी न्युज नेपाल
काठमाडौं, १० भदौ
नेपाल नेपाली नारीहरुको महान चाड हरितालिका तीजको पावन अवसर पारेर राष्ट्रिय संगीतकर्मी संघ केन्द्रिय कार्यसमितिले ‘तीज विशेष साँस्कृतिक तथा दर खाने कार्यक्रम – २०७९’ आयोजना गरेको छ । संघका केन्द्रिय अध्यक्ष बिक्रम जंग शाहको अध्यक्षता सम्पन्न सो कार्यक्रमको प्रमुख अतिथिमा महिला, बालबालिका तथा जेष्ठ नागरिक मन्त्री उमा रेग्मी थिईन् । कार्यक्रममा संघका महिला कलाकारहरुलाई दर खुवाउने कार्य सम्पन्न गरियो ।
नेपाली नारीहरुको महान चाड तिजको अबसरमा नाचगान सहित दर खाने कार्यक्रम आयोजना गरिएको संघका अध्यक्ष बिक्रम जँग शाहले बताए । यस्तो कार्यक्रमले महिला कलाकारहरुमा अझ प्रेरण मिल्ने उनको कथन थियो । उक्त कार्यक्रममा गीत संगीतको लागि नेपाल सरकारबाट सक्दो सहयोग गरि कलाकारहरुको हकहितको लागि काम गरिदिन केन्द्रिय अध्यक्ष बिक्रम जंग शाहले अनुरोध गरेका थिए ।
कार्यक्रममा मन्त्री उमा रेग्मीले सबैलाई तीजको शुभकामना व्यक्त गर्दै नारीहरुले सबैतिर अधिकार पाउनु पर्ने आबाज उठाईन् ।
कार्यक्रममा सांसद माननीय लक्ष्मी परियार, राष्ट्रिय लोक तथा दोहोरी गीत प्रतिष्ठान नेपाल कि कार्यबाहक अध्यक्ष रिता थापा मगर, प्रकाश कटुवाल, सरोज लामिछाने, प्रतिमा अर्याल लगायत थुप्रै कलाकार, समाजसेवी र पत्रकारहरुको उपस्थिति रहेको थियो ।
सो कार्यक्रमको संयोजक उमा श्रेष्ठ रहेकी थिइन् भने केन्द्रिय महासचिव अमृत खातिले कार्यक्रम सञ्चालन गरेका थिए । विभिन्न कलाकारहरुले कार्यक्रममा आफ्नो चर्चित तीज गीत प्रस्तुत गरेर कार्यक्रमलाई तीजमय तुल्याएका थिए ।
