ब्युटी न्युज नेपाल
काठमाडौं, ३२ असार
चलचित्र ‘सम्झना–बिर्सना’ले शनिबार दर्शक राम्रो साथ पाएको छ । त्रिकोणात्मक प्रेम कथामा आधारित यो चलचित्रको प्रोमेसनको क्रममा अभिनेता आकाश श्रेष्ठ र अभिनेत्री पुजा शर्मा शनिबार मध्यान्नमा काठमाडौंको अष्ट नारायण लगायतको सिनेमा हल पुगेका थिए । त्यहाँ दर्शकको निकै घुइँचो थियो । नायक नायिकासँग प्रत्यक्ष साक्षात्कार गर्दै फिल्म हेर्न पाउँदा दर्शकहरु पनि निकै खुसी भए ।
यो चलचित्र शुक्रबारबाट देशब्यापी प्रदर्शनमा उत्रिएको हो । आकाश श्रेष्ठ र पूजा शर्मा मुख्य भूमिकामा रहेको फिल्मले प्रदर्शनको पहिलो दिन भन्दा शनिबार देशभरका हलमा उत्साहजनक ब्यापार गरेको यसको निर्माण पक्षले जनाएको छ ।
अद्वितीय प्रधानको प्रस्तुति र रेविका प्रधानको निर्माण रहेको फिल्ममा आकाश चियाबगानको मालिक र पूजा कर्मचारीको भूमिकामा छन् । उनीहरुबीचको सम्बन्ध,प्रेम र समग्र जीवनमा आउने उचातचढावलाई रोमान्चक तवरले केलाइएको यो चलचित्रमा छुल्ठिम गुरुङ, सुनील थापा र शिशिर राणा पनि महत्वपूर्ण भूमिकामा छन् ।
निमेष प्रधानको लेखन र निर्देशनमा बनेको फिल्ममा दार्जिलिङ्गको चिया बगानमा कार्यरत मज्दुरको जीवनशैली, पीडा, समस्या र हकअधिकारको कुरालाई समेत प्राथमीकताका साथ प्रस्तुत गरिएको छ । त्यहाँका सुन्दर दृष्यहरु नेपाली दर्शकका लागि निकै आकर्षक र मनमोहक बनेको छ ।
देशभरका करिब एक सय स्क्रिनमा प्रदर्शन भइरहेको यो चलचित्र दार्जिलिङ,सिल्गुढी तथा सिक्कीमका रमणीय स्थानमा खिचिएको हो । निर्देशक निमेषकै लेखन रहेको फिल्म शिब ढकालले खिचेका हुन् । आरआर फिल्मस्ले बितरण गरेको फिल्मको ‘हाँस्ने खेल्ने बेलैमा’ बोलको गीत केही सातासम्म निरन्तर ट्रेन्डिङमा रहीरह्यो । निर्माण पक्षले फिल्मको शीर्ष गीत–सम्झना बिर्सना पनि चाँडै ल्याउने भएको छ ।
