ब्युटी न्युज नेपाल
काठमाडौं, १७ जेठ
आगामी १० भदौमा रिलिज हुने चलचित्र ‘प्रकाश’को टिजर दर्शकमाझ आएको छ । यो चलचित्रको टिजर मंगलबार युट्युबमार्फत सार्वजनिक गरिएको हो । टिजरमा अभिनेता प्रदिप खड्का र अभिनेत्री दिया मास्केको मुख्य भूमिका समेटिएको छ । कर्णालीका एक शिक्षकको भूमिकामा अभिनेता प्रदीप प्रस्तुत भएका छन् ।
यो चलचित्रलाई दिनेश राउतको निर्देशन गरेका हुन् । अभिनेता प्रदीपले शिक्षक बन्न गर्ने संघर्षको कथा यो चलचित्रमा प्रस्तुत गरिएको निर्देशक राउतले बताएका छन् । सिनेमाको टिजरले जनयुद्धमा सहभागी बेपत्ता योद्धाको परिवारको कथा पनि समेटिएको छ ।
यो चलचित्रमा प्रदिप खड्का, दीया मास्के सहित रेनु योगी, प्रकाश घिमिरे, निरज पन्थी, गोविन्द सुनुवार, रामबाबु रेग्मी, लोकेन्द्र लेखक, दिपेन्द्र शाही लगायतका कलाकारको अभिनय रहेको छ । जुम्लामा छायाँकन भएको सिनेमाको डिजिटल राइट्स डिएआर मुभिजले खरिद गरेको छ ।
चलचित्रको टिजरको पृष्ठभूमिमा बज्ने कर्णालीको लोक भाकाले त्यहाँको परिवेशसँग नजिक बनाएको छ । सिनेमाको यसअघि फष्टलुक पोष्टर सार्वजनिक गरिएको थियो । पोष्टर सार्वजनिक भएसँगै ‘प्रकाश’ले दर्शकमाझ कौतुहलता पैदा गर्न सफल भएको थियो ।
बिनिस इन्टरटेनमेण्टको ब्यानरमा निर्माण भएको सिनेमामा राजेश श्रेष्ठको छायाँकन, जीवन थापाको सम्पादन, सुवास भुषाल, दिपक शर्मा, तारा प्रकाश लिम्बु र एलिस कार्कीको संगीत, उत्तम न्यौपानेको साउण्ड डिजाइन र शैलेश श्रेष्ठको पाश्र्व संगीत रहेको छ । महेन्द्र अधिकारीको लगानी रहेको सिनेमालाई आरआर फिल्मस्का रोहित कट्टेल र रत्न श्रेष्ठले वितरण गर्दैछन् । फिल्मलाई बिकास सुबेदीले लेखेका हुन् ।
