ब्युटी न्युज नेपाल
काठमाडौं, १० चैत
नयाा चलचित्र ‘ए मेरो हजुर ४’को ट्रेलर रिलिज गरिएको छ । बिहिबार साँझ काठमाडौंको बिग मूभिजमा एक समारोहबीच सो फिल्मको ट्रेलर रिलिज गरिएको हो ।
चलचित्रका मुख्य अभिनेता अनमोल केसी र अभिनेत्री सुहाना थापाबीचको प्रेम सम्बन्धमा आएको आरोह अबरोहलाई ट्रेलरमा प्रस्तुत गरिएको छ । सुहानालाई नेवार समुदायकी युवती र अनमोललाई क्षत्री समुदायका युवाको रुपमा प्रस्तुत गरिएको छ । उनीहरुको अन्तरजातीय प्रेम सम्बन्धको कथा ट्रेलरमा छ ।
झरना थापाले निर्देशन गरेको यो चलचित्र आगामी १ बैशाखबाट नेपालभरका सिनेमा घरमा रिलिज हुने भएको छ । चलचित्रलाई नयाँ बर्षको अवसर पारेर रिलिज गर्न लागेको यसकी निर्देशक झरनाले बताईन् ।
सोही मितिमा भारतीय फिल्म केजीएफ २ रिलिज हुने भए पनि आफुहरु सो फिल्मसँग भिड्न तयार गरेको निर्माता सुनिल कुमार थापाले कार्यक्रममा बताए । अभिनेता अनमोलले पनि आफुहरु बिदेशी फिल्मसँग नडराउने र दर्शकले आफुहरुलाई मायाँ गर्ने विश्वास सो कार्यक्रममा व्यक्त गरे ।
सोही समारोहमा बोल्दै अभिनेता भुवन केसीले ए मेरो हजुर ४ ले सुस्ताएको नेपाली चलचित्रको बजारलाई फेरी तताउने विश्वास आफुले लिएको बताए । फिल्मको सफलताको लागि उनले शुभकामना दिए ।
निर्देशक झरना थापाले आफुहरुले यसपटक पनि राम्रो फिल्म बनाएको जिकिर गरिन् । उनले सिनेमाले दर्शकको मन जित्ने विश्वास लिएकी छिन् । यो चलचित्रमा अनमोल केसी, सुहना थापा, सलोन बस्नेत, रवी गिरीलगायतका कलाकारको मुख्य भूमिका छ ।
यो चलचित्रको पटकथा र संवाद झरनासँगै छेतेन गुरुङ, मन्दिप गौतम, प्रतिक पौडेल, बाबुराम दाहाल, उपकार पाण्डे र माधव शर्माले लेखेका हुन् । सिनेमाको कथा पनि निर्देशक थापाले नै लेखेकी हुन् । सुहाना इन्टरटेनमेन्ट र सुनिल कुमार थापा प्रोडक्सनमा सुनिल कुमार थापाले निर्माण गरेका हुन् ।
