ब्युटी न्युज नेपाल
काठमाडौं, २२ माघ
ओली सरकारले गरेको संवैधानिक निकायको नियुक्ती बिरुद्ध आज नेपाल कम्युनिष्ट पार्टी (नेकपा) दाहाल–नेपाल समूहले देशव्यापी आमहड्ताल गरेको छ । सो आम हड्ताल सफल बनाउन यतीबेला सो समूहको विभिन्न नेता र कार्यकर्ता सडकमा उत्रिएका छन् । आज बिहान ५ बजेबाटै आम हडतालमा उत्रिएका नेकपा दाहाल नेपाल समूहका नेता तथा कार्यकर्तालाई प्रहरी ठाउँ ठाउँबाट पक्राउ गरेको छ ।
यसै क्रममा आज बिहान प्रहरीले कलंकीबाट नेकपा स्थायी कमिटी सदस्य अष्टलक्ष्मी शाक्यसहित अन्य नेता कार्यकर्तालाई पक्राउ गरेको हो । दाहाल नेपाल समुहले नेतृ शाक्यलाई कलंकी क्षेत्रको कमान्डर तोकेको थियो ।
आमहड्तालमा प्रहरी प्रशासनले राजधानीमा सुरक्षा व्यवस्था कडा बनाएको बताएको छ । तथापि सवारी साधनहरु चलेका छैनन् । प्रहरीका अनुसार हालसम्म बन्द गराउँदै हिँडेका केही कार्यकर्ताहरुलाई सोह्रखुट्टे, महाराजगञ्ज र नयाँ बानेश्वरबाट समेत पक्राउ गरिएको छ ।
सो क्षेत्रबाट नेता तथा कार्यकर्ताहरु पक्राउ गरिए पनि पुन कार्यकता भेला भएर फेरी आमहड्ताल कडा बनाईएको नेकपा दाहाल नेपाल समूहले बताएको छ ।
