ब्युटी न्युज नेपाल
काठमाडौं, १६ पुष
गायक आशिष सचिनको नयाँ गीत सार्वजनिक भएको छ । उनी ‘पिरिम नलाउने’, ‘एक कान दुई कान मैदान’, ‘गलबन्दी पछ्यैरी’ जस्ता सफल गीतका गायक हुन् ।
सार्वजनिक ‘ए मुना’ बोलको गीतमा आशिषसँगै प्रविशा अधिकारीले उनलाई स्वरमा साथ दिएकी छिन् । वियोगान्त भावमा तयार भएको यस गीतमा सन्तोष सुनारको शब्द तथा संगीतमा रहेको छ ।
गीतको भिडियोमा गायक आशिष सचिन र सम्पदा बानियाको अभिनय देख्न सकिन्छ । भिडियोमा प्रेम र विछोडको पीडालाई देखाइएको छ ।
मनोज बस्नेतको कन्सेप्ट तथा निर्देशनमा बनेको भिडियोलाई अर्जुन तिवारीले खिचेका हुन् । भिडियो सम्पादन तथा कलरिङ सुप्रिम पराजुलीले गरेका छन् । गायक सचिन यस गीतबाट निकै आशावादी देखिन्छन् । आफूले गरिरहेको भन्दा केही फरक शैलीमा यस गीत तयार भएको आशिषले बताए ।
अडियो तथा भिडियोमा निकै मिहिनेत गरेको भन्दै दर्शक–श्रोताले मन पराउनेमा गायक सचिन ढुक्क छन् । उनी भन्छन्, ‘मेरो यसअघिका गीतभन्दा यो गीत निकै भिन्न छ । मैले पहिलो पटक स्याड गीत गाउने प्रयास गरेको छु । आशा छ, मलाई यस गीतमा पनि पहिलाको जस्तै माया गर्नुहुनेछ ।’
https://youtu.be/niGYDGuOs9s
