ब्युटी न्युज नेपाल
काठमाडौं, १७ भदौ
दुई साता देखि बन्द रहेको काठमाडौं उपत्यकामा तीनवटै स्थानीय निकायले भोली १८ भदौबाट फेरी एक साताको लागि कफर्यु थप गरेको छ । त्यसैले अब काठमाडौं उपत्यकाबासीहरु अझै एक साता कम्तिमा पनि घरभित्रै बस्नुपर्ने भएको छ । पछिल्लो दिन देशभरीकै सबैभन्दा बढी कोरोना सँक्रमित काठमाडौं उपत्यकामा भेटिन थालेको छ । दुई साता देखि काठमाडौंमा कफ्र्यु लगाउँदा पनि कोरोना सँक्रमित नघटेपछि गृह मन्त्रायलसँग छलफल गरेपछि काठमाडौं, ललितपुर र भक्तपुरका तीन प्रमुख जिल्ला अधिकारीहरुले भदौ १८ गतेबाट फेरी १ साताको लागि निषेधाज्ञा अर्थात कफ्र्यु थप्ने निर्णय गरेका छन् । देशभर अहिलेसम्म कोरोना सँक्रमितको सँख्या ४१ हजार नाघेको छ भने मृतकको सँख्या आजसम्म २५१ जना पुगेको छ ।
पछिल्लो समय सबैभन्दा बढी सँक्रमित काठमाडौं उपत्यकामै भेटिएका छन् । काठमाडौंका मेयर देखि काठमाडौं उपत्यकाका विभिन्न वडा अध्यक्ष समेत अहिले सँक्रमित भएका छन् ।
सोही कारण स्थानीय निकायललगायत विभिन्न व्यक्तिहरुले काठमाडौंमा कोरोना सँक्रमण समुदायमा फैलिएको भन्दै अझै २ साता कडा कफ्र्यु लगाउनु पर्ने सल्लाह सरकारलाई दिएका थिए । तर स्थानीय निकायले अहिलेलाई १७ भदौ राती १२ बजेबाट २४ भदौ राती १२ बजेसम्म कफ्र्यु थप गरेको छ ।
औषधि, खाद्यवस्तु र अत्यावश्यकीय वस्तु खरिदमा यसअघि पनि रोक लगाइएको थिएन । यद्यपि, बाहिर निस्किँदा मास्क अनिवार्य लगाउनुपर्ने भनिएको थियो । यस्तै सञ्चार, सुरक्षा, स्वास्थ्य लगायत अत्याबस्यक सेवाका लागि सम्बन्धि कार्यालय वा निकायको पास लिएर हिड्ना छुट दिईएको थियो । सो क्रम जारी रहने छ । यस्तै नियमित सेवा प्रदान गर्नुपर्ने कार्यालय जाने कर्मचारी विहान ९ बजेदेखि साढे १० बजेसम्म र बेलुका ३ देखि साढे ५ बजेसम्म आउजाउ गर्न सक्ने भनिएको छ ।
होटल, रेष्टुरेन्ट, फुटपाथ पसल अझै बन्द हुने निर्देशन दिईएको छ । बैंक लगायतका निकायले न्यूनतम कर्मचारी राखेर स्वास्थ्य सुरक्षाको मापदण्ड पालना गरी सेवा दिन सक्नेछन् ।
उपत्यकामा कोरोना भाइरसको संक्रमण बढेपछि तीनै जना प्रमुख जिल्ला अधिकारीले ३ भदौदेखि लागू हुने गरी एक साता निषेधाज्ञा लगाउने आदेश जारी गरेका थिए । त्यसपछि पनि कोरोना सँक्रमण घटेन । सोही कारण १० भदौमा पुनः ७ दिनका लागि निषेधाज्ञा लम्ब्याउने निर्णय भएको थियो । सो निषेधाज्ञा आज बुधबार राती १२ बजेबाट सकिँदैछ । सोही कारण आज राती १२ बजेबाटै थप ७ दिनका लागि कफ्र्युको समय बढाईएको छ । कोरोना जो कोहीमा पनि सरेको हुनसक्ने भएकाले यस्तो अबस्थामा घरमै बसेर आफु र परिवारलाई सुरक्षित राख्नु होला ।
