ब्युटी न्युज नेपाल
काठमाडौं, १३ असोज
अभिनेत्री रेजिना उप्रेती र अभिनेत्री बिमला केसीले नेपाली चलचित्र क्षेत्रका अग्रजदेखि समकालिन तथा नयाँ पुस्तासम्मका नौ जना अभिनेत्रीलाई विशेष सम्मान गरेका छन् ।
यो वर्षको बडा दशैं तथा नौरथाको अबसर पारेर सोमबार बेलुका एक भव्य सम्मान समारोहबीच नौ जना अभिनेत्रीलाई राष्ट्रिय नवदुर्गा सम्मान २०७६ बाट सम्मानित गरेका हुन् ।
उपप्रधान तथा रक्षामन्त्री ईश्वर पोखरेलले सोमबार बेलुका राजधानीको जमलस्थित नाचघरमा सांगीतिक समारोहबीच सो सम्मान प्रदान गरेका हुन् ।
सो समारोहमा सम्मानित हुने अभिनेत्रीहरूमा नेपाली चलचित्र क्षेत्रको पहिलो पुस्ताबाट प्रथम नेपाली चलचित्रकी आमाद्वय भुवन चन्द र वसुन्धरा भुसाल छन् । नेपाली चलचित्र क्षेत्रमा दिएको विशिष्ट योगदानको कदरस्वरूप यी दुईलाई नौरथाको अवसर पारेर नव दुर्गाको नामबाट सम्मापित सम्मानबाट सम्मानित गरिएको हो ।
यस्तै २०४४ को दशकबाट दुई अभिनेत्री गौरी मल्ल र करिश्मा मानन्धरलाई नेपाली चलचित्र क्षेत्रमा तीन दशकभन्दा लामा समय योगदान पु¥याएको भन्दै विशेष योगदानस्वरूप यी दुईलाई नव दुर्गा सम्मान प्रदान गरिएको हो ।
दसैंको अवसर पारेर नव दुर्गाको नामबाट स्थापित राष्ट्रिय नवदुर्गा सम्मानबाट उनीहरू सम्मानित भएका हुन् । यस्तै २०५० को दशकका तीन अभिनेत्री अभिनेत्री रेखा थापा, दीपाश्री निरौला र सञ्चिता लुइँटेल पनि विशेष योगदानअन्तर्गत राष्ट्रिय नव दुर्गा सम्मान सम्मानबाट सम्मानित भए ।
नेपाली चलचित्र क्षेत्रमा आफ्नो अभिनयबाट उल्लेख्य योगदान दिएको भन्दै उनीहरूलाई सम्मान गरिएको हो ।
पछिल्ला पुस्ताका दुई अभिनेत्री नम्रता श्रेष्ठ र स्वस्तिमा खड्कालाई पनि नेपाली चलचित्र क्षेत्रमा दिएको योगदानको कदर गर्दै राष्ट्रिय नव दुर्गा सम्मानबाट सम्मानित गरिएको हो ।
सो समारोहमा उपप्रधान तथा रक्षामन्त्री ईश्वर पोखरेलले आयोजक पक्षले नव दुर्गा सम्मानबाट सही कलाकारलाई सम्मान गरेको भन्दै उनले सम्मानितलाई बधाई ज्ञापन गरे । नेपाली चलचित्रलाई यहाँसम्म ल्याउन यी अभिनेत्रीको उल्लेख्य योगदान रहेको बताए ।
सो कार्यक्रमकी आयोजक तथा अभिनेत्री विमला केसीले कलाकारलाई राज्यतर्फबाट केवल गहना भनिए पनि उल्लेख्य सम्मान नगरिएकाले आफूहरूले सम्मान गरेको बताए । यो सम्मानले सम्बन्धित अभिनेत्रीलाई अझ प्रोत्साहन मिल्ने विश्वास उनले व्यक्त गरिन् ।
आयोजक एवं अभिनेत्री रेजिना उप्रेतीले दसैंमा नव दुर्गाको पूजा आराधना चलिरहेको बेला नव दुर्गाको नामबाट नेपाली चलचित्र क्षेत्रका अभिनेत्रीलाई उनीहरूको योगदानको कदरस्वरूप यो सम्मान गरिएको बताइन् ।
सो सम्मान समारोहमा करिब २ घण्टा विविध सांगीतिक कार्यक्रम आयोजना गरिएको थियो । सो सांगीतिक कार्यक्रममा उपप्रधानमन्त्री पोखरेलसमेत निकैबेर रमे । कार्यक्रममा चलचित्र विकास बोर्डका अध्यक्ष केशव भट्टले दुई अभिनेत्रीले नौ जना अभिनेत्रीलाई राष्ट्रिय नवदुर्गा सम्मान प्रदान गरेर अभिनेत्रीको अझ हौसला बढाएको बताए ।
सांगीतिक कार्यक्रममा अग्रज गायक अननन्द कार्कीले आधा दर्जन गीत सुनाए । अभिनेता यशराज गराच र अभिनेत्री पवित्रा आचार्यको नृत्यले पनि कार्यक्रमको रौनकता बढायो ।
अभिनेता गजित विष्ट र गम्भीर विष्टको समीक्षा पोखरेलसँगको नृत्य पनि कार्यक्रमको आकर्षक बन्यो । विभिन्न कलाकारले चर्या नृत्य गरेको सो सम्मान तथा सांस्कृतिक कार्यक्रममा अञ्जली अधिकारीको नृत्य देविका बन्दनाको गायनमा दर्शकहरु खुसी भए ।
